August 2 thleng Serie A pawt sei
Italian Football Federation (FIGC) chuan August 2 thleng tun season Serie A chu an pawh sei thu an ti chiang a, league khelh chhunzawm leh hun tur erawh tih chian theih a la ni lo thung.
Khawvel ram hrang hrang zingah Italy hi Covid-19 tuar nasa an ni, mi 25000 chuangin an thih pui tawh. Serie A club 20 ngaihdan an lakah a tam zawkin league khelh zawh hram duh mah se an tum angin a la kal thei rih lo.
Italian club-te hian May 4 aṭangin training zangkhai deuh neih ṭan an tum a, player leh coaching staff in awm pawlh bakah awmkhawm dual dual chu an la khap chhunzawm rih ang.
FIGC president Gabriele Gravina chuan, "Football khawvel a buai a, harsatna sutkian dan tur ṭha ber hi hriat theih a la ni lo. Mitin him taka an awm theih huna inkhelh leh chauh hi kan duh dan a ni a, chutih rualin mi tam takin sum leh pai bakah an hun ṭha an hloh kan chhut tel a ngai ve bawk," a ti.