Liverpool-in Kerkez la lut

Premier League champion Liverpool an chet nat chhunzawm zel a, nimin khan Milos Kerkez chu Bournemouth aṭangin an la fel ta. Kum 21 mi left back manah hian pound maktaduai 40 an inseng a, kum nga chhung atan contract a ziak.

Hungary international Kerkez chuan, "England-a club lian ber, khawvela club langsar ber zinga mi ka zawm thei hi ka lawm takzet a, ka phur em em a ni," tiin a sawi.

Reds hian Kerkez hmain attacking midfielder Florian Wirtz (£116mtd) leh right back Jeremie Frimpong (£29.5mtd) te chu Bayer Leverkusen aṭangin an la lut tawh a, Hungary Under-21 keeper Armin Pecsi chu £1.5mtd-in an la tawh bawk.