MPFA-in hruaitu thar thlang

Mizo Professional Footballer Association (MPFA) chuan 2025-2027 chhunga an hruaitu tur an thlang a, President atan President ni lai Jeje Lalpekhlua chu thlan nawn niin, Secretary atan Lallianzuala Chhangte an thlang nawn bawk.

MPFA hian June 26, Ningani khan Lunglei-ah charity match an khel a, Lunglei professional footballer-te nen inkhelin, 2-1 in an chak. Inkhelh zawhah hian hruaitu term a tawp tak avangin hruaitu thar thlanna an nei nghal.

Chennaiyin FC forward hlui Jeje hian inkhelh chawlhsan tawh mah se, MPFA lamah hruaitu a la nih chhunzawm reng a, Mizo footballer-ten eizawn nana football an hman nan theihtawp a la chhuah chhunzawm.

Vice President-ah hian Mizo midfielder ṭha mi Lalrindika Ralte chu thlan niin, assistant secretary-ah Mumbai City chhuahsan hlim Daniel Lalhlimpuia, treasurer-ah Hyderabad midfielder Isaac Vanmalsawma leh finance secretary atan Sreenidi Deccan forward Brandon Vanlalremdika te an thlang.

MPFA hian Mizo professional footballer-ten an eizawnna kawngah harsatna an tawh loh nan theihtawp an chhuah ṭhin - season chawlh apiangin midangte ṭanpui nan charity match an buatsaih ṭhin a, Mizorama chhiatna tawk leh mi harsa zawkte tan sum tam tak an lo thawk chhuak tawh.

Season tinin Mizoram professional footballer che ṭhate chawimawina hun an hmang ṭhin bawk a, season hman zawh takah khan MSTA-MPFA Player of the Year-ah Mohun Bagan midfielder Lalengmawia Ralte thlangin, MSTA-MPFA Young Player of the Year-ah FC Goa midfielder Ayush Chhetri an thlang bawk.