Goal 300 khungtu Haaland

Manchester City striker Erling Haaland chuan Club World Cup-ah City tan goal a khung a, a top flight career-ah club leh ram tan goal 300 a khung tling ta - City hian Juventus chu 5-2 in an sawp.

Camping World Stadium, Orlando-a team pahnih an intawn hmain last 16 an lut tawh tih a chiang a, mahse, star player rual kawltu team an nih avangin fans 54,320 zetin a hmunah inkhel an en tho.

City tan Jérémy Doku chuan minute kuana lekah goal hmahruai khungin, Juve hian minute hnih hnuah Teun Koopmeiners hmangin si phurh an sut a, tun hnaia a chhuah loh tur thu sawitu, City keeper Ederson chet sual vang a ni.

Team pahnih hi an inngam tawk viau dawn niin a lang hman. Mahse, City-in ngaihdan dang an nei - Matheus Nunes-a cross satliah tak chu, French defender Pierre Kalulu chuan tibuaitu nei lo chungin an lamah a tilut.

City-in 2-1 a hmahruai chungin chawlhlawk an hmang a, second half-ah bench aṭanga luhtir Haaland chuan an goal thumna a khung a, top level-ah club tan goal 258 a khungna a ni a, Norway tan goal 42 a khung tawh bawk. Haaland-a goal khung hnuah Phil Foden leh Savinho ten an belhchhah ve leh a, 5-1 in hma an hruai.

Juve tan striker Dusan Vlahovic chuan a khung belh ve leh a, awmzia erawh a nei phak lo - City hian last 16-ah Al Hilal an hmachhawn ang a, Juve-in Real Madrid an tawng thung ang.

Group G inkhel dangah Al Ain chuan 2-1 in Wydad AC an hneh a, result-in awmzia erawh a nei tawh lo. Morocco club Wydad tan Cassius Mailula chuan goal hmahruai a khung a, UAE club Al Ain hian Kodjo Fo-Doh Laba (penalty) leh Kaku te goal hmangin an lehthal.