Wimbledon kan nghak chhuak leh dawn ta

Tennis inelna hlun leh ngaihhlut Wimbledon chu June 30 aṭangin khelh ṭan a ni dawn a, player inlan phak tur pawh an chiang kim dawn hnai, tun kar chhungin qualifying khelh zawh a ni ang.

Seeded chang phak tur chin tihfel a ni tawh a, kuminah hian Carlos Alcaraz chu mipui en bik a ni dawn - Spanish star hian Wimbledon title hnuhnung pahnih a la thei, a zawna a vawi thum nan lak leh a tum dawn a ni.

Alcaraz beiseina

French Open an khelh zo a, hah takin inelna a hmachhawn - Carlos Alcaraz chuan beiseina nei sang lo tak chungin London khawpui a pan tih a sawi a, mahse Queen's Club Championship-ah a chungnung ber.

Roberto Bautista Agut nen an inkhelh zawh hnuah Alcaraz chuan, "Grass court boruak chu a nung leh chiah e," tiin a sawi. Clay leh grass hi ball kal dan a inang lo em em a, player tam tak chu an insiamrem hman ṭhin lo.

Queen's Club-a inelna an hmachawn zawh hnu khan Alcaraz hian, "He hmunah hian champion beisei in ka lo kal lo, naumti taka inkhel turin ka kal tawp," a ti. French Open champion a nih hnuah a hlawhtling zui leh thei a, atan boruak a nuam rih hle.

Kum 22 mi Alcaraz hian US Open 2022 title a la a, a hnu kum lehah Wimbledon champion a ni leh bawk - season hmasa khan major title pahnih a la. Rod Laver, Bjorn Borg, Rafael Nadal, Roger Federer leh Djokovic te hnung zuiin season khata French Open leh Wimbledon la kawp thei a ni.

French Open leh Wimbledon hi season khat a la kawp thei, vawi khat aia tam hlawhtling nawm thei erawh mi pahnih chiah an la awm - Nadal (2008 & 2010) leh Borg (1978, 1979, 1980) te a ni a, an hnung zui a tum ve leh ang.

Dal thei tu?

Tun season kal laiah Alcaraz hi vawi nga chiah a la chak lo - kum tir lamah Novak Djokovic, Jiri Lehecka, Jack Draper leh David Goffin te a ngam lo; heng a chak lohnate hi March ral hma lama thil thleng vek a ni, thla thum chhungin a che ṭha lo.

March a ral a, chumi hnu lamah chuan Holger Rune lakah vawi khat a chesual tih bak chu chak loh a nei tawh lo. Hneh theitu an awm tih chu a chiang a, chutihrualin a chet fuh laklawh lai chuan midang tan hneh a harsa hle tih a chiang bawk.

Kum tir lamah hian Jannik Sinner chu hrem a ni - Italian tlangval hi Australian Open khelh zawh hnuah thla thum chhung atan an hrem, a lo kir leh hnuah ṭha takin khel nghal mah se Alcaraz-a kaltluang lai chu a pawt ding zo bik chuang lo.

French Open final an khelh ṭum khan, world number 1 Sinner hian set hmasa pahnih a la, mahse a tawpah erawh a chak lo zawkah a ṭang. A kum naupang zawk hret mah se Alcaraz hi a rilru a paukhauh em em a, a tawp ṭhak thlengin a ṭang thei.

Sinner hi seeded sang zawk a ni a, a ranking a san zawk bawk avangin dah hniam theih a ni lo. Seeded sang pahnih an nih avangin final hma chu an inhmachhawn lo ang, final ropui leh hmuhnawm min chhawp chhuahsak leh a nih pawhin a mak lo ang.

Line judge awm lo

Wimbledon chuan kuminah hian line judge an hmang dawn lo, ball kal a dik em tih enfiah nan hian electronic line-calling (ELC) an hmang dawn, kum 148 hnua a vawi khat nen line judge an awm dawn lo a ni.

Australian Open leh US Open te chuan ELC hi an lo hmang tawh - Wimbledon atan hman a ni leh dawn avangin French Open chauh chu mihring mit hmanga line endikna a ni dawn ta, anni pawhin an la hmang zui ve maiin a rinawm.

Wimbledon 2025 khelhna hrang hranga camera an dah belh chu 450 chuang a ni a, khawl changkang tak chuan ball chak chu a out nge out lo chu rang takin a rawn sawi thei mai dawn a, tihsual a tlem bakah a awlsam phah dawn bawk niin an sawi.

Line official ni ṭhinte chu an hna an chan dawn tihna erawh a ni chuang lo, tun hma lama line judge lo ni ṭhinte chu match assistant atan an ṭang chhunzawm dawn, anni hian chair umpire an pui ṭhin ang.

Tennis court tinah match assistant pahnih zel an awm dawn a, engtiang takin nge an ṭhatpui dawn tih chu sawi vek theih erawh a la ni lo. Tournament hi chawlhkar hnih chhung khelh a ni dawn, chumi hnuah a nghawng chu a hriat theih ang.