McLaren driver pahnih boruak a ṭha

Pathianni zan dar 6:30 hian Formula 1 Austrian Grand Prix chu Red Bull Ring-ah an tlan dawn. Season hmang ṭha tak McLaren team chu ngaihven hlawh an ni a, an driver pahnih te erawhin an boruak a ṭha tih an sawi.

Intlansiak an neih hnuhnung ber Canadian Grand Prix-ah khan, McLaren driver pahnih Oscar Piastri leh Lando Norris te an inbakkaiha a, anni hi driver championship lama inum lai an nih bawk avangin sawi zui an hlawh.

Inelna an neih zawh hnuah Norris chuan Piastri-a car a sut avangin ngaihdam a dil a, ani hian inelna a hmachhawn zui thei lo; a hma lama awm Piastri erawh palinaah thlengin a teammate ai hian point 22-in a sang zawk.

Championship hmahruaitu Piastri chuan, "Dan kan nei a, chumi dan chu a la pangngai reng. Team pakhat tana tlan dun driver te chu an inti chhe tur a ni lo a, midang lak aṭang pawhin an inveng tawn zawk tur a ni.

"Tih palh chu a awm thei, mahse fimkhur erawh a pawimawh. Nuam ti leh engthawl takin inelna kan hmachhawn dun tur a ni a, boruak nuam tak hnuaiah tun karah pawh hian kan intlansiak leh ang," tiin a sawi.

McLaren hian driver champion an neih lohna a rei tawh, kum 2008 daih tawh kha khatih laia la naupang tak Lewis Hamilton kha a champion, a hnung zui theitu an la awm leh rih lo, kuminah beisei an nei sang chho leh mek a ni.