Arsenal-ah Lewis-Skelly a nghet

England defender Myles Lewis-Skelly chuan Arsenal tan kum nga daih contract a ziak thar a, season thar tawp ruala an inremna neih sa zo mai tur chu hun rei zawk atan an pawtsei a ni.

Kum 18 mi Lewis-Skelly hian season hmasa kha a hmang ṭha, coach Mikel Arteta kaihhruaina hnuaiah inelna hrang hrangah match 39 a khel a, hmun pawimawh a chang phak.

Gunners academy aṭanga inzir chhuak Lewis-Skelly chuan, "Hlawhtlinna chan ka chak em em a, inelna sang leh boruak liana hlawhtling turin ka bei dawn a ni, ka tihsual leh tawnhriat aṭang khan thil tam tak ka zir chhuak ve bawk," a ti.

Season hmasa khan Lewis-Skelly hi Premier League match pahnihah hnawhchhuah a ni a, mahse Wolves nen an inkhelh ṭuma a red card hmuh erawh sut leh a ni thung, inkhel pawimawha card hmuh loh zir te pawh a la mamawh.

Nipui bazarah Arsenal an buai chhunzawm viau. Martín Zubimendi, Christian Norgaard leh Kepa Arrizabalaga te nen inremna an neih hnuah Cristhian Mosquera chu Valencia aṭanga lak chhuah tumin an hel mek.

Defender Mosquera hi kum 20 mi a ni a, season hmasa khan La Liga club tan league match 37 zetah minute 90 a khel tling a, a kum la naupang deuh mah se rinrawl a ni der tawh.

Arsenal hian Crystal Palace aṭangin Marc Guehi pawh an lo ngaihven tawh. Mahse, Guehi hian Gabriel Magalhaes leh William Saliba te kara khelhna hmuh a beisei ngam lo a, tuna an hel lai Mosquera erawh a laiah leh right back atana hman theih a ni thung.