Leicester-in Nistelrooy an ban

Premier League aṭanga an tlak hnuah Leicester City chuan coach Ruud van Nistelrooy chu an ban ta nge nge a, Foxes hian inhriatthiam tawnnaa inṭhen an nih thu sawi mah se, an ban ngei a nih a rinawm zawk.

Dutch coach hian November 29, 2024 khan Foxes hi a enkawl ṭan a, Foxes a zawm hian table-ah 16-na niin, relegation zone aṭangin point khatin an him - season a zawh meuh chuan table-ah 18-na niin, Championship-ah an tla.

Nistelrooy chuan, "Leicester player, coach, academy leh staff, ka thawhpui zawng zawngte chungah club tana an inpekna leh an professionalism avangin lawmthu ka sawi a ni," a ti a, King Power Stadium a thlah.

Manchester United striker hlui hian Foxes hi match 27 kaihruaiin, vawi nga chiah a chakpui a, vawi thum draw neiin, vawi 19 an tlawm. EPL-ah match nga khelh tur an la nei tihin an tla tih a chiang tawh a, fans tam tak ngaihdanah chuan Foxes hian an ban har zawk!

Foxes hian 2023-24 season kha Championship-ah nomawi chawiin, EPL khel turin an tling a, mahse, coach Enzo Maresca chuan Chelsea a zawm zui. Tawnhriat nei ṭha Steve Cooper an la lut a, mahse, thla thum chiah a enkawl hman.

Cooper-a hnuaiah match 15 khel hmanin, vawi thum chiah a chakpui a, vawi sarih an tlawm - hetihlai hian United coach lailawk Nistelrooy-a enkawl Red Devils chu vawi hnih an hmachhawn hman a, an tlawm ve ve.

Nistelrooy an la lut zui a, a match hmasa berah West Ham hneh nghal mah se, kar thum a liam meuh chuan relegation zone-ah an awm.

Foxes hian first-team coaching staff-te kaihruainain pre-season chu an ṭan phawt dawn a, tun dinhmunah chuan coach turin Everton leh Burnley boss hlui Sean Dyche-a hming a ri ring hle.