Burnley-in Tuanzebe la lut

Premier League kai thar Burnley chuan Axel Tuanzebe an la lut a, Ipswich Town centre back hian Ipswich-ah a contract a hman zawh tawh avangin free transfer-in Burnley hi a zawm.

Kum 27 mi defender hi Manchester United academy chhuak niin, United bakah Aston Villa, Napoli leh Stoke City-ah te loan-in a khel tawh a, 2023 khan Ipswich a pan.

Ipswich a zawm lai hian Championship club an ni a, Premier League a kaipui. Inelna hrang hrangah match 45 khelin goal khat a khung a, Championship lama an relegate leh tak avangin Burnley lamah a pem zui.

England tana age level-a inlan, tun hnua DR Congo international ni ta Tuanzebe hian kum khat atan contract a ziak nia sawi a ni a, Burnley-in tun nipuia player an lak pathumna a ni.

Scott Parker-a enkawl team hian Tuanzebe hmain Feyenoord left back Quilindschy Hartman leh German second division club Karlsruher goalkeeper Max Weiss te an la lut tawh.