Atletico-in Diego Costa chhuah zalen
La Liga hmahruaitu Atletico Madrid chuan an striker chhuanvawr ni ṭhin Diego Costa contract chu inhriatthiam tawnnain an tihtawpsak a, Brazilian striker hian a contract pangngai ang chuan June 2021 thleng cham turin Madrid khaw club-ah hian contract a nei.
Mahse, Atletico-a tla tlum lo striker hian mimal thil avangin Spanish club hnenah hian chhuah a dil a, kum 32 mi striker dilna hi Atletico chuan ngaih pawimawhsakin an pawmsak ta a ni.
Atletico chuan, "Costa hian a mimal thil avangin chhuah a dil a, rem kan tihsak ta a ni. Atletico chuan club tana a inpekna avangin Costa chungah lawmthu kan sawi a, a hma hun atan duhsakna kan hlan a ni," an ti.
Costa hi Arsenal leh Wolves nen sawizawm an ni a, Chelsea tana season thum a khelh chhunga Premier League nomawi vawi hnih chawi thei a nih avangin English football-ah a ngaihtuahawm loh ang.
Brazil mi, Spain khua leh tui nihna a neih avanga Spain tana inlan thlangtu Costa hian 2013-14 season khan Atletico aṭangin a hming a chher a, hemi season-ah hian match 52 khelin goal 36 ngawt a khung.
Atletico aṭang hian Chelsea a zawm a, mahse, hetihlaia London club manager Antonio Conte-a'n a mamawh tawh loh thu a hrilh hnuah Atletico-ah bawk a kir.
Spain-a a kir lehnaah erawh beisei angin a hlawhtling tawh lo a, inelna hrang hranga match 81-a khelhsakah goal 19 chiah a khung - tun season-ah hliamin a tibuai ve bawk nen, match sarih lek khelin goal hnih chiah a khung a ni.
La Liga hmahruaitu ni mek Atletico hian zanin dar 11:45-ah league match khel turin Getafe an mikhual dawn a, Real Madrid chuan zing lam dar 2:00-ah Elche an lenchilh thung ang - Madrid khaw club pahnih hian point 32 ve ve an nei mek a, Real hian match hnihin an khel tam thung.
Zanin Inkhel Tur
Granada 09:30 PM Valencia
Atletico Madrid 11:45 PM Getafe
Celta Vigo 11:45 PM Huesca
Elche 02:00 AM Real Madrid
December 31, Ningani Zan
Athletic Bilbao 06:30 PM Real Sociedad
Osasuna 08:45 PM Deportivo Alavés