Wimbledon chu...

Tennis tournament zinga upa ber tiin an sawi ṭhin - All England Lawn Tennis leh Croquet Club ten an buatsaih niin a hming tak chu 'Wimbledon Championships' a ni a, sawi awlsam nan Wimbledon an ti mai ṭhin.

Kum 1877 aṭanga khelh ṭan a ni a, indopui pahnihna leh hripui leng vanga khelh theih loh chang erawh an nei, kumin hi vawi 137 an neihna tur niin, kum dang ang bawkin London khawpuiah an khel leh dawn a ni.

A tirah chuan Wimbledon khelhna hi phaitualhnim chi khat 'perennial ryegrass' hlang a ni ṭhin a, kum 2001 aṭang khan ti danglam hretin perennial ryegrass hi 70% an hmang a, heimi karah hian 'Creeping Red Fescue' chu 30% an telh a, phul a ti tloin inelna tawp lam thlengin a ṭha bik niin an sawi.

Grand Slam dang ang lo takin Wimbledon hian kalphung a nei, player inkhelte chu a var vekin an inthuam ṭhin, anmahnu duh zawng rang ang ngawt an ha thei lo, a vara inthuam hi kum 1963 aṭanga an kalpui tawh kha niin an la chhawmnung zel.

Wimbledon chuan kuminah hian line judge an hmang dawn lo, ball kal a dik em tih enfiah nan hian electronic line-calling (ELC) an hmang dawn, kum 148 hnua a vawi khat nen line judge an awm dawn lo a ni.

Australian Open leh US Open te chuan ELC hi an lo hmang tawh - Wimbledon atan hman a ni leh dawn avangin French Open chauh chu mihring mit hmanga line endikna a ni dawn ta, anni pawhin an la hmang zui ve maiin a rinawm.

Wimbledon 2025 khelhna hrang hranga camera an dah belh chu 450 chuang a ni a, khawl changkang tak chuan ball chak chu a out nge out lo chu rang takin a rawn sawi thei mai dawn a, tihsual a tlem bakah a awlsam phah dawn bawk niin an sawi.

Line official ni ṭhinte chu an hna an chan dawn tihna erawh a ni chuang lo, tun hma lama line judge lo ni ṭhinte chu match assistant atan an ṭang chhunzawm dawn, anni hian chair umpire an pui ṭhin ang.