World Police C'ship-ah Lalhumhimi'n gold medal la

World Police Championship 2025-ah Lalhumhimi, Zemabawk North chuan Judo (52kg) huangah gold medal a hlawh chhuak.

Nikum June-ah khan All India Police Judo Cluster chu Guwahati, Assam-ah neih a ni a, hemi ṭum hian Humhimi hi a champion a, gold medal a lak avang hian World Police Championship, Alabama, USA-a neihah hian a khelh theih phah a ni.

Indian Police Lalhumhimi hian tun hma pawhin Mizoram a lo ti hmingṭha fo tawh ṭhin. National Games 2022-ah pawh khan Judo (-52kg) huangah gold medal a lo la tawh bawk a, North East Games 2016-ah pawh Mizoram tan gold medal bawk a lo hawn tawh.

Senior Judo Championship 2017 neih a ni pawh khan Humhimi hi pathumna a lo ni tawh a, a khelh fuh ni chuan India ram chhungah a ṭha berte zinga mi a ni phak a, tunah chuan khawvel huapah medal a la ta ni.

Home minister K. Sapdanga chuan social media kaltlangin lawmpuina thu sawiin, "India mai ni loin khawvel huap inelnaah Mizo Police hming a lang a, gold medal hial a la thei kan nei hi a lawmawmin a chhuanawm ka ti takzet.

"Police leh taksa fit neih hi a inhmeh a, hriselna ṭha tak nena hma lam hun hmang tur leh Police ti hmingṭha zel turin duhsakna ka hlan," a ti. Sports minister Lalnghinglova Hmar pawhin Humhimi a lawmpuina thu hi a ziak ve bawk.