Champion-na hun ṭha a ni - Djokovic

Novak Djokovic chuan a vawi 25 nan Grand Slam nomawi chawi ngei a tum dawn a, atan Wimbledon chu mellung pawimawh phun theihna remchang a nih ngei pawh a beisei thu a sawi.

Serbian star hian seeded parukna pek a ni a, zanin hian a match hmasa ber atan Alexandre Muller nen an inkhel dawn, harsa lutuk loin hnehna a chan theih mai pawh a rinawm.

Wimbledon vawi sarih champion tawh Djokovic chuan, "Sawi lawk vek theih ni lo mah se kumin Wimbledon hi ka tan chuan hun ṭha a nih ngei ka beisei, tun hma lama sulhnu ka lo neih tawh nen ka chhut pawhin a phurawm ka ti hle.

"Champion tur erawh chuan vanneih ringawt a tawk dawn lo, khawvela a ṭha ber anga khelh chhuah leh a ngai dawn, chumi ti thei tur chuan ka taksa leh rilru pawh a inpeih viau a ni," tiin a sawi.

Grand Slam nomawi 24 a lak tawh zinga pasarih chu All England Club-ah hian a ni a, kuminah hian a hlawhtling leh a nih chuan champion tam ber Roger Federer (8 titles) a nihrual thei ang.

Mipa player zingah Djokovic hi major title la tam ber a ni, vawi 22 champion Rafael Nadal chu amah hnaih bertu niin a chawk tawh. Hmeichhe player ropui Margaret Court nen an champion zat a intluk, kalsan theihna remchang a nei dawn a ni.

Kum 38 mi Djokovic chuan, "Kumin hi Wimbledon ka khelh hnuhnung ber a ni thei tawh, ka kum chhutin a tawpna a nih pawhin a mak lo ang. Mahse, theih ni se la chuan hrisel takin awm ila, hun rei tak chhung ka inkhel thei ni ila ka duh.

"Ka hma hun erawh sawi lawk a harsa, eng tournament mai pawh hi a tawpna a ni chho zel thei tawh tih ka hria, chuvangin hun ṭha hnuhnung hi bawhpelh loh ka duh," tiin a sawi a, champion tur erawh chuan hna a hautak chho hle ang.