PSG hmachhawn tur Bayern

Club World Cup quarterfinal-ah final atana awhawm khawp inkhel kan hmu dawn - Paris St-Germain leh Bayern Munich an inkhel dawn a, July 5, Inrinni zanah an intawng ang.

PSG chak thu hre sain, Pathianni zan khan Club World Cup last 16-ah Bayern Munich an inlan a, Brazilian club ṭha Flamengo chu 4-2 a hnehin quarterfinal an lut a, PSG an hmachhawn dawn.

Hard Rock Stadium-a inkhelah Bayern hian goal an khung hma a, minute rukna lekah Joshua Kimmich-a corner aṭanga ball kal chu Chilean midfielder Erick Pulgar chuan an lamah a tilut.

Brazilian club ṭha Flamengo an insiamrem hman lo - minute thum hnuah Harry Kane a inlar a, Dayot Upamecano-a hnathawh ṭhat zarzoin, English striker hian Bayern goal hnihna a khung.

Bayern hian Flamengo hi an sawp mai dawn niin a lang hman. Mahse, Gerson chuan minute 33-naah si phurh a rawn sut ṭhen a, Flamengo an phur - an phur chhung erawh a rei lo hle.

Minute 41-naah Leon Goretzka chuan ṭha zetin an goal thumna a khung ve leh a, Bayern-in 3-1 a hmahruai chungin chawlhlawk an hmang - second half ṭan aṭanga minute 10 hnu lawkah Flamengo-in penalty an hlawh chhuak zui.

De Arrascaeta-a shot chu Michael Olise chuan a kuta lo tawk fuhin penalty a chawi a, Chelsea leh Arsenal midfielder hlui, tun nipuia Flamengo pantu Jorginho chuan goal-ah a chantir a, Bayern keeper Manuel Neuer a bum chiang hle.

Jorginho-a'n goal a khung chiah hian, 3-2 a ni a, beiseina thar a awm. Mahse, Kane-a'n Club World Cup champion a duh tih pholangin, a goal hnihna a khung ve leh a, Brazilian Serie A club-in a chhanletna tur an neih tawh loh avangin Bayern an chak chiang.

Kane hian Club World Cup-a match li a khelhah goal thum a khung tling ta der a, vawi khat assist a nei bawk.