Coach mumal lo Sinner a zam lo

Jannik Sinner chuan coach nei mumal rih lo mah se Wimbledon champion nih theih a inbeisei a, grass court inelna lian hmachhawn thei turin a inpeih tawh hle tih a sawi bawk.

Italian tlangval hian hremna a hman zawh hnuah fitness coach Giacomo Naldi leh physio Umberto Ferrara te chu a ban a, anni pahnih hian nikum September khan coaching team zawmin Simone Vagnozzi leh Darren Cahill te nen an thawk ho a ni.

Anni kaihhruaina hnuaiah hian Australian Open champion a ni a, mahse damdawi hman phal loh chungchangah an fimkhur tawk lo nia ngaiin an thawh hona an titawp; a hnuah French Open final lut leh mah se a chak lo thung.

World number 1 Sinner chuan, "Kan thawh hona a tawpna a la rei lo, mahse ka inkhelh danah nghawng a nei hran lem lo. Engthawl leh zalen takin tennis ka khel thei leh tawh a, thil engkim hi chhan nei veka thleng a ni tih hriatthiam a pawimawh.

"Tunah chuan buaina ka nei lo. Roland Garros final-a ka chak loh avang khan mi ṭhenkhat chuan hnual mai turah mi ngai a, training ka nei ṭha zui em em a, tunah chuan inelna hautak hmachhawn thei turin ka inpeih leh tawh hle," tiin a sawi.

Kum 23 mi Sinner hian Wimbledon 2023 khan semifinal a khel phak a, final erawh a la lut phak ngai lo, vanglai hmang chho mek a nih avangin kuminah hian a vawi khat nan champion a beisei ang.

Grand Slam vawi thum champion tawh Sinner hian Wimbledon a khelh vawi ngana tur a ni a, tawnhriat a nei tam tawh. Zanin hian a match hmasa berah amah ang bawka Italian mi Luca Nardi nen an inkhel dawn a ni.