Pep-a'n Klopp-a ngaihdan a hrethiam

Liverpool manager hlui Jurgen Klopp chuan na takin FIFA Club World Cup a sawisel a, German manager chuan inelna ṭul lo leh football-a thil tih puitlin zinga ngaihtuaha fuh lo ber ang hialin a sawi.

Klopp-a ngaihdan chungchang sawiin Manchester City manager Pep Guardiola chuan, "Jurgen nen hian vawi tam tak kan inel tawh a, a ngaihdan lo pian chhuah dan hi ka hrethiam. England-ah kan inhmachhawn a, UEFA hnuai inelnaah kan inhmachhawn leh a, Premier League calendar chungchang kan sawi a, inkhel ṭha zawk awm theih nan chawlh tam zawkte kan sawi.

"Inkhel ṭha zawk chhawp chhuak tur chuan chawlh tam zawk neih a ṭul tlat. Chuvangin Klopp-a thusawi hi mak ka ti lo a, ka hrethiam. Amah hi ka zah em em bawk. Chutihrualin manager kan nih angin team enkawl chu kan hna a ni. Inelna buatsaihtu kan ni lo a, FIFA, UEFA, Premier League dan kan zawm mai a ni a, chuvangin inelnaa kan tel thei hi kan inchhuang em em a ni," tiin Klopp-a ngaihdan a hriatthiam thu a sawi.

Pep-a'n sawi chhunzawmin, "Team tam takin an sawisel nachhan chu an tel ve loh vang a ni a, tel ve se chuan an ngainat ka ring. Club media bakah club ṭantute an tel ang a, sum an la lut dawn bawk. Chutihrualin hun erawh a chep deuh a, season thar atan thla hnih tal inpuahchah chu kan duh. Mahse, a nihna ang hian kan pawm thiam mai a ngai. Tun hmaa kan chet ṭhat vangin tun inelna hi kan tel thei a, kan tel takah chuan a ṭha thei ang bera khelh kan duh," tiin nomawi chawi ngei an tum thu a sawi.

Manchester City hian tukin zing dar 6:30 hian Al Hilal nen last 16 an khel dawn a, hnehna an chang a nih chuan Inter Milan leh Fluminense chak zawk nen July 4, Zirtawpni zan dar 12:30-ah an inkhel leh ang.