Result ṭha beiseitu Swiatek

Iga Swiatek chuan season dang zawng aiin kumin Wimbledon-ah hian result neih ṭhat a beisei thu a sawi, zanin hian a match hmasa ber atan Polina Kudermetova a hmachhawn dawn a ni.

Nikuma thla khat chhung hremna a tawrh hnuah Swiatek hian ngai a la awh leh lo, vawi li a champion tawhna French Open-ah pawh semifinal paltlang zo loin a tla, kum dang ang bawkin grass court hi atan hmun ṭha a ni lo mai thei bawk.

Paris khawpui aṭanga a tlak hnuah Wimbledon lam a hawi a, inbuatsaihna tournament pakhat Bad Homburg Open khelin final hial a lut, mahse Jessica Pegula a hneh loh avangin pahnihnaah a lungawi a ngai.

Wimbledon seeded pariatna Swiatek chuan, "Vawi leh khata danglam vek chu ni lo mah se grass court-ah tun hma ai chuan ka khel ṭha zawk tih ka hria a, sawi lawk theih vek ni lo mah se hma ka sawn tih chu ka inhria.

"Nikum lama ka khelh tawh dan te ka chhut a, ka che vel a dikin a zângkhai zawk," a ti. Wimbledon bikah hian 2023 khan quarterfinal a thleng a, chumi aia sang a la thleng ngai lo, kuminah hmasawn hret a tum ang.

Kum 24 mi Swiatek chuan, "Tennis player nih hi a awlsam lo, kum khat chhungin tournament 20 bawr vel kan khelh a ngai. Grand Slam bakah inelna kan hmachhawn ngei ngai a awm nual a, chungte nen chuan a hautak thei hle.

"A chang chuan ram tana kan inlan loh phah a ngaih hial chang te a awm. Kan khelh tur zat kan khelh loh chuan kan tuar thei a, ranking point kan hum a ngai tel bawk," tiin a sawi.