Chelsea-in Pedro an la lut dawn

Premier League club Chelsea an che na leh tawh - Blues hian Brighton & Hove Albion aṭangin forward Joao Pedro an la lut dawn a, he thu buatsaih a nih lai hian official taka puanzar la awm lo mah se, an inrem fel vek tawh.

Blues hian Pedro la lut tur hian pound maktaduai 60 an inseng dawn - £55mtd an pe phawt ang a, a dang £5mtd erawh a khelh ṭhat dan a zir leh club result-a zira pek belh tur a ni ang.

Kum 23 mi forward hian Brazil aṭangin Club World Cup khelhna US a pan nghal a, medical a nei ang a, an duh chuan Chelsea hian US-a neih mek inelnaah hian an chhawr nghal thei ang - kum sarih chhung Stamford Bridge-a khel turin contract a ziak dawn bawk.

Newcastle United pawhin Pedro hi lakluh an duh a, mahse, Brazilian striker hian Blues zawm a duh zawk nia sawi a ni. Hetihlai hian Premier League club pahnih, an hming tarlan lohte dawrna chu Brighton hian an hnar bawk niin khawthlang media-te chuan an sawi.

Brazil tana vawi thum inlan tawh Pedro hian May 2023 khan Brighton hi Watford aṭangin a zawm a, £30mtd man niin, club player man to ber a ni a, season hnih an kawl hman.

Brighton tan match 70 khel hmanin, goal 30 a khungsak a, assist vawi 10 a nei bawk. Chelsea hian tlarhma an inthuam nasa hle - Pedro hma hian Jamie Gittens chu Borussia Dortmund aṭangin £55mtd-in an la lut a, Ipswich Town striker Liam Delap chu £30mtd-in an la tawh bawk.