Besiktas-ah Abraham a kal dawn

AS Roma striker Tammy Abraham chuan Serie A club hi a chhuahsan dawn a, Turkish club Besiktas a zawm ang - he thu buatsaih a nih lai hian official taka puanzarna a la awm lo thung.

Italian chanchinbu La Gazzetta dello Sport chuan Abraham hian euro maktaduai 20-in Besiktas hi a zawm dawn niin an sawi a, hetihlai hian Italian media ṭhenkhat chuan a manah inremna fel tak a la awm lo niin an sawi.

Roma hian €20mtd hi an chhiar a, mahse, Besiktas hian €16mtd velin an ngam chauh niin an sawi. Engemaw harsatna a awm thut a nih loh chuan rem erawh an inrem ngei a rinawm a, Roma hian financial fair play rule an bawhchhiat loh nan Abraham hi hralh ngei an duh.

Russian club Zenit St. Petersburg pawhin English striker hi lei an duh a, mahse, Abraham hian Russia ai chuan Turkey lam pan a duh zawk.

Kum 27 mi Abraham hian kum 2021 khan Roma a zawm a, match 120 a khelhsakah goal 37 khungin, assist 13 a nei a, season hmasa kha AC Milan-ah loan-in a khel.

Milan club tan hian match 44-ah goal 10 a khung a, assist vawi sarih a nei tel. Tunah chuan Turkey lam panin a puanthuah a tel dawn ta a, €6mtd chu kum khata a hlawh tur a ni - Roma-ah hian kum khatah €5mtd a hlawh mek.