Norris-a'n a ṭhianpa Piastri a hnaih zel

Formula 1 champion nih tumin McLaren driver pahnih an inum zel - Pathianni zana tlan zawh tak Austrian Grand Prix-ah Lando Norris a chak ber, champion tumna inumna lamah a teammate Oscar Piastri nen an inkar a sawrzim nghal bawk.

Red Bull Ring hi Max Verstappen tan hmun ṭha a ni ṭhin, mahse kuminah erawh McLaren driver pahnih ten umphaktu an tawng lo a, champion lai Verstappen erawhin inelna a hmachhawn zo ve thei lo.

Intlansiak tir lamah Verstappen hi Kimi Antonelli chuan a su, hei vang hian a tlan zui thei lo - Dutch tlangval tan chanchin lawmawm loh tak a ni ang. Driver championship lamah a chunga awm Norris chu point 61 ngawtin a phak lo, a hmabak a hautak chho tawh dawn.

Hnehna changtu Norris chuan, "Kei leh ka teammate hi kan inel na hle mai a, boruak nuam leh hlimawm tak hnuaia inel chu a nuam. Oscar kha a tlan ṭhain inum pawh a nuam, a nawmna ti zualtu chu pakhatna leh pahnihna kan ni thei hi a ni," a ti.

Intlansiak hnuhnung zawkah McLaren driver pahnih hi an inbakkaih a, tun ṭumah pawh intai palh an nei leh teuh hle. Piastri chuan, "Intlansiak entu lam tan a hlawk thlak ngei ka beisei, car ṭha tak hmanga inum chu a nuam.

"A ṭha ber nih tuma bei ve ve kan ni a, zalen takin kan chevel thei. Chutihrualin midang chhiatna tur duh lo tu ve ve kan ni a, tun ṭumah pawh khan kan inveng tawn," tiin a sawi. Inelna neih hma khan team pakhat tana tlan dun chu intihpalh a rem loh thu an lo sawi tawh bawk.

Tun hnai season li chhung chu Red Bull leh Max Verstappen ten Formula 1 an awp thei a, mahse season hmasa chawhnu lam aṭang khan MacLaren hian an chhaih buai phak, kuminah phei chuan an che ṭha zawk.

July 7, Pathianni hian Silverstone tlankawngah British Grand Prix an tlan leh dawn. Verstappen-a'n insiamṭhat a tum dawn a, tualchhung tlangval Lewis Hamilton chu ṭan rawn a ni leh dawn bawk, inelna a hmuhnawm leh dawn tih a chiang.