Assen-ah pawh Marc Marquez bawk a chak

Marc Marquez chuan a kum tam deuh tawh hnu, hliam leh harsatna hrang hrang a paltlang hnuah vanglai a hmang ṭha leh a ni ber mai - Pathianni zana tlan zawh tak Dutch MotoGP-ah hnehna a chang.

TT Circuit Assen-a intlan-siakah Marquez hian amah elphaktu a nei lo, intlansiak tak hmain Sprint Race lamah hnehna a chang tawh bawk a, tlan chhinna an neih laiin vawi hnih chesual mah se hun pawimawh laiah a chesual duh lo.

Kum 32 mi Marquez hnungah hian Aprilia bike khalhtu Marco Bezzecchi a thleng a, pathumna chu Francesco Bagnaia a ni thung - Alex Marquez erawh Pedro Acosta nen intipalhin intlansiak a hmachhawn tluan ve thei lo.

Spanish rider Marc Marquez chuan, "Alex chunga thil thleng kha pawi ka ti lutuk, ka pa chuan ka unaupa hi a kutzungṭang a hliam tih min lo hrilh, hliam hi chu infiamna in a ken tel a ni ve bawk si.

"A nihna takah chuan Assen hi ka tan hmun ṭha tak a ni ngai meuh lo, tunah erawh chawlhkar tawp nuam leh hlimawm tak ka hmanna hmun a ni ta thung, ka tan chuan hun ṭha a ni," tiin a sawi.

Bike intlansiakna sang berah hian Marquez hi vawi 68 a chak tling ta chiah a, chak tam lamah Giacomo Agostini-a a nih rual ta chiah; hnehna chang tam ber Valentino Rossi a phak lohna erawh vawi 21 lai a la ni thung.

Season kal laiah Marc Marquez hian a nau Alex Marquez aiin point 68 zeta hmu tamin hma a hruai mek a, vawi ruk ngawt a chak tawh avangin a chesual viau a nih ngawt loh chuan a champion ngei pawh a rinawm ta hle.

July 12-13 hian Germany GP chu Sachsenring-ah an tlan dawn a, tun season chhunga intlansiak 22 an neih tur zinga a zatve an tlan tlinna chiah a ni ang.