Medvedev a tla nghal

A thinrim a insum zo lo a, a ṭhutna leh bag inkar chu racquet-in a vaw nghek a, awmzia erawh a nei lo - Daniil Medvedev chu hneh nei loin Wimbledon 2025 aṭangin a tla fel nghal a ni.

Thawhṭan zan inkhelah, world number 9 Medvedev hi chak tura rinkai zawk ni mah se world number 64 Benjamin Bonzi lakah 7-6 (7-2), 3-6, 7-6 (7-3), 6-2 in a chak lo zawkah a ṭang a, grass court inelna lama recod ṭha lo chu a thai reh thei rih lo.

Wimbledon a khelh hnuhnung pahnihah Medvedev hian semifinal a thleng phak, final la lut chiah lo mah se hma a sawn ve zel niin a lang a, mahse kuminah erawh tun hma lama a ze ṭha lo kha a la kalsan kim lo tih a lang.

Kum 29 mi Medvedev chuan, "Ka khel chhia pawh a ni lo, ṭha pangngai tak khel chung si kha a chak lo zawkah ka ṭang, tun aia ṭha leh zual zawka khelh dan tur kha chu ngaihtuah thiam mai pawh a harsa ka ti.

"Bonzi-a khelh dan khan min barakhaih em em a, ṭha takin a khel thei tih pawh ka hria, mahse tun ang taka ṭha kha chuan a khel ang tih ka ring phak bik lo, a theihna sang tak a lantir kha a lawmawm," tiin a sawi.

Medvedev chauh hi player langsar zinga tla nghal a ni bik lo. Seeded pariatna Holger Rune chu set nga an khelh hnuah a chak lo a, hminbg langsar zinga mi Stefanos Tsitispas chu hliam vangin a inkhel thei thei lo bawk.

Denmark tlangval Rune hian a tirah chuan set hnihin hma a hruai fal, mahse a tawpah chuan world number 143 Nicolas Jarry lakah 4-6, 4-6, 7-5, 6-3, 6-4 in a chak lo zawkah a ṭang. Inelna lianah pawh beisei loh result a thleng thut thei tih fiahna a ni.

Stefanos Tsitsipas chu Valentin Royer lakah 6-3, 6-2 in a sang zawk mek a, Greek tlangval Tsitsipas hi a khel zui thei lo. Set hnihna an khelh lai pawhin Tsitsipas hi a hnungzâng na vangin enkawl lailawk a ngai a, a hnuah chhunzawm leh mah se a tawp a thleng zo lo.