Harsa takin Alcaraz a chak

Hnehtu chu hnehtu an ni a, a tawpah chuan engtiang in nge a chak tih aiin tu nge chak tih chu sawi zui hlawh leh daih rei zawk a ni ṭhin - Wimbledon khelh ṭan aṭangin boruak a nung nghal hle. Wimbledon hian 'hnehna a pawimawh ber' tiin an website lamah an ziak hial.

Grass court inelna lian ber an khel ṭan a, champion lai Carlos Alcaraz chuan fiahna hautak a hmachhawn nghal. Inkhel hmuhnawm leh inhnehtawk takah Alcaraz hian Fabio Fognini chu darkar li leh minute 37 chhungin 7-5, 6-7 (5-7), 7-5, 2-6, 6-1 in a hneh.

Seeded pahnihna Alcaraz hian zaninah Oliver Tarvet a hmachhawn leh dawn, tualchhung tlangval hi qualifying paltlanga inlan niin Leandro Riedi lakah 6-4, 6-4, 6-4 in hnehna a lo chang ve thung a ni.

Hnehna chu

Centre Court a nih tawh chuan a boruak a danglam ṭhin a, kum 38 mi Fabio Fognini hian tawnhriat a nei ṭhain Wimbledona khelh hnuhnung ber a ni a, a tir aṭanga a tawp thlengin a bei nasa hle.

Set hnuhnung ber an khelh laiin inkhel entu zingah damlohna vanga enkawl ngai an awm, world number 2 Alcaraz hian a tui vawt chu damlo enkawl nan hian a pe ve a, minute 15 vel chawlh lailawk a nih hnuah an khel chhunzawm leh chauh a ni.

Italian star Fognini-a'n a beidawn san mai dawn emaw tih hnuah pawh huaisen takin a bei let ṭhin a, set nga a khelh pui thei kha thil mak a ni zawk hial, a tawpah erawh thahrui ngah leh vanglai hmang mek a dingchang ta zawk.

Wimbledon bikah Alcaraz hi a zawna vawi hnih champion thei a ni a, tun hnaiah pawh match 19 chhung hneh loh nei loin a kaltluang mek a, boruak lum tak (32C) hnuaia inkhelah pawh a tawp thlengin a ṭang tlang thei.

Hmasawn ngai

French Open champion a nih hlimah grass court inelna a hmachhawn chhunzawm a, Wimbledon inbuatsaih nan hian Queen's Club Championship khelin a champion bawk, tunah inelna lian khel lehi a match hmasa berah erawh a khel ṭha tawk lo.

Grand Slam vawi nga champion tawh Alcaraz chuan, "Ka theihtawp a ṭha chuan ka khel a, ka bei bawk. Mahse, tun aia ṭha zawk khan ka la khel leh thei tih ka hria, khaw lum tak hnuaia match rei tak khelh chu a awlsam lo hle.

"Ni sa hnuaiah kan inkhel a ni a, thahrui a heh bik takzet, taksa a chauin mit a hah tel bawk," a ti. Spanish star hian inbuatsaihna chu nei ṭha viau mah se Wimbledon meuh chu a boruak a danglam hle tih a sawi bawk a, hmasawn erawh a tum.

Chak lo Fognini hian tun season tawp rualin tennis chawlhsan a tum thu a lo sawi tawh a, atan chuan Wimbledon a khelh hnuhnung ber a ni nghal. Alcaraz chuan, "Player ropui tak nen Wimbledon kan khel dun thei hi ka lawm," tiin a thlah.

Hmabak Tarvet

Alcaraz-a hmachhawn leh tur hi Oliver Tarvet a ni a, kum 21 mi chauh niin world number 733 a ni. A ranking a hniam vanga zuam ngawt erawh a fuh lo thei, tualchhung mi a nih avangin ṭantu a nei ṭha dawn, a match hmasa berah Leandro Riedi a hneh thei a ni.

Tarvet, "Wimbledon ka khelh dawn khan thlen chin tur bika beisei leh duh ka nei lo, nuamti tak tennis khel turin ka kal ve tawp. Tu pawh hmachhawn ka hreh lo a, ka hneh thei vek tih ka hria, chung zingah chuan Alcaraz pawh a tel," a ti.

A kum la tam lo mah se a chezia leh ṭawngkam aṭangin boruak a ngam tih a chiang. University of San Diego-a lehkha zirlai niin National Collegiate Athletic Association (NCAA) hnuaia inzir chhuak a ni bawk.

NCAA dan leh hrai hnuaiah chuan player ten kum khatah inkhelhna aṭangin £7,290 aia tam an lalut thei lo, tuna Wimbledon second ropund a luh vang hian £99,000 (Rs 1,16,44,993) hlawh tur a ni a, dan ang chuan a hlawh tur zat pawh a la thei dawn lo tihna a ni.