Hojlund out, Watkins in?

Manchester United chuan Rasmus Hojlund an chhuahtir theih chuan Ollie Watkins chu an lakluh tum zingah a tel. Watkins chungchangah United thuneitute leh Aston Villa thuneitute pawhin an indawr tawh niin sawi a ni.

Villa hian season hman zawh taka loan hmanga an hawh Marcus Rashford erawh lak nghet an tum lo a, £40mtd-in Enlgish striker hi lak an tum lo. United lamin Rashford hi £40mtd tala chhuahtir dan tur an zawng mek thung.

Club pahnih hi Rashford mana Watkins pek thlengin an indawr hman a, mahse Rashford hian Barcelona pan a duh. Chutihrualin United hi striker lamah an la insawr bing thei lo a, Brentford-in Bryan Mbeumo chungchanga an dawrna an hnawl avangin Cameroonian striker la turin sum an seng tam lehzual a ṭul dawn.

Watkins hian season liam ta khan goal leh assist vawi 24 a nei a, striker zingah Alexander Isak (29) leh Erling Haaland (25) te chauh a tluk lo. Villa tan match 184 khel tawhin goal 75 a khung tawh a, season hnuhnung pangaah goal 10 a khung tling vek bawk.

Villa hi Premier League profitability and sustainability rules (PSR) vangin an buai a, Watkins hi an mamawh a nih pawhin hralh a ṭul theih dan a awm. Chutihrualin PSR dan an zawm theih nan hmeichhe team hralh tumna a awm bawk.

Kumin January thla khan Arsenal-in Watkins hi lak an tum a, Gunners hian £40mtd sen an inhuam laiin Villa lamin £60mtd lamin an chhiar a, indawrna a hlawhtling ta lo. Man United hian beiseina sang tak nen kum 2023 khan hmabak nei êng Hojlund an lalut a, beisei a phak miau loh avangin Danish striker chungah dawhtheihna an nei tlem tawh.

Ruben Amorim-a'n Sporting Lisbon-a a enkawl tawh Viktor Gyokeres lakluh a duh a, mahse Swedish striker hian Arsenal a thlan zawk a rinawm. Victor Osimhen leh United pawh sawi rik ni mah se Nigerian striker hlawh hi a sang mah mah a, Frankfurt striker Hugo Ekitike pawh club lamin a manah €100mtd a phut daih avangin United-in a lakna sum an nei lo.

Man United hian Christopher Nkunku chungchangah Chelsea nen pawh an indawr a, Alejandro Garnacho chhuahtir dan pawh an zawng tel. Chutihrualin thil chiang erawh Amorim-a'n a striker duh ber a lak theih a rinawm lo a, an budget mil tawk striker an melh. Watkins hi United tlin tawka ngaih a ni.