Silly Point: Welcome to Edgbaston, Birmingham

England ram chhungah khuan heng Indian Sub Continent vai kan tih mai hi an ṭhahnem em em mai a, a bik takin, Birmingham khua phei chu vairam tenau hi a ni ringawt mai a. Hamara Desh team tan chuan home ground ang deuh thaw a ni.

Ṭhumvawr pawimawh lo?

Cricket inkhela ṭhumvawr pawimawhzia kan sawi fo. A bik takin ni nga awh Test match inkhelah phei chuan ni lina leh ngana chhoah pitch a lo phut chho ṭan a. Ball vawmtu lam tan advantage nasa tak a awm ṭhin avangin, ṭhumvawra chak hi chuan vuak hmasak hi sawm zela vawi riatte thlan dan a nih hial ka ring.

Mahse, England team coach Brandon McCullum a hnuaia an tactic hlawhtling tak hman mek. Bazball avang leh ground enkawltu - curator te hnenah pitch ni nga daih tur, a lei phut ve mai mai lo tur an han buatsaih tir aṭang hian, target umtu nih hi Engand team hian an thiam ta riau mai a ni.

Bazball & Target um

Kum 147 a upa Test cricket-ah hian, kar hmasa Headingley Test-a English hoin 370 runs chuang an umphak tum khan, 350 runs aia tam target um hlawhtling thei ṭum 10 thlenna chauh a ni. Chumi zinga a chanve (5) chu tun hnai kum 10 chhunga thleng vek a ni nghe nghe.

Kum thum liam ta khan tuna India team tho, an bowling attack pawh inang deuh chiah. Prasidh Krishna aiah Md Shami khami ṭum khan a awm thung. Khami ṭum khan England team lakah tho hian vawiin tlaia an inkhelhna tur Edgbaston khelmualah ngei hian 378 runs an lo huhim zo tawh lo bawk a nih kha. Bazball leh pitch ni nga daih an siam vang a ni ber a. History hi rawn thleng nawn leh tak maw?

Bazball vs Indian tactic

Indian batting line up hi chu ngaihtuah awm lo turah ka ngai. Mahse Bumrah tel lohna ball vawmtu lam Department hi he Edgbaston pitch-ah hian wicket 20 la thei tur khawpin an hriam em tih hi zawhna lian tak a ni?

Test match-ah hian chak tur chuan wicket 20 lak a ngai miau mai si a. Hemi avang hian India hian Kuldeep Yadav an khelh tir ngei ngei a ngai in ka hria a. England-ah ball spin kual pup pup loh mah se, an bowler neih ṭhat ber te an remkhawm a ngai a ni tawp mai a ni.

England Bazball tactic hian bowlers te hahdamna hun a siam meuh lo tih a chiang a, kar lovah session hnih khat lekah game an thlak danglam duai fo reng a, heng vang tak reng hian Indian batter-ten 1st innings-ah run ṭhahnem tak, a bowler-te thlanmuanpui tham an vuak chhuah loh chuan, road roller a chho zawnga namkal tum ang lek a ni leh dawn.