Wimbledon-ah no. 1 Sabalenka-i a chak

Aryna Sabalenka tan Wimbledon a match hmasa berah harsatna lian tham a thleng lo - world number 1 leh seeded pakhatna ni bawk hian world number 194 Carson Branstine chu straight set hmanga hnehin second round a lut.

Court 1-a inkhelah, rinkai zawk Sabalenka hian darkar khat leh minute 13 chhungin 6-1, 7-5 in hnehna a chang. Season hmasa kha chuan dar (shoulder) hliam vangin a inkhel thei lo a ni a, tunah erawh hun ṭha a nei chho mek.

Canadian nula Carson Branstine hi player langsar tak a ni ngai lo a, model a nih tel avang erawh chuan hriat a hlawh. Inkhelh hmain Sabalenka chuan, "Nalh tak a ni," tiin a khingpui tur chungchang a sawi, a inkhelh dan erawh sawi tur a la hriat vak loh a ni thung.

Rin ai takin Carson Branstine hian a khel thei, a bik takin a service a na hle bawk. Set hnihna bikah phei chuan Sabalenka hian a khingpui service chhuhsak turin game 11-na a nghah a ngai hial, a tawpah erawh chungnung zawk a ni.

Inkhel dangah Ons Jabeur erawh a khel tluan thei lo - Tunisian star hian tun hmain Wimbledon final vawi hnih a khel tawh a, hriat hlawh tak zinga mi niin a lakah beiseina a sang bawk. Mahse, Viktoriya Tomova a hmachhawn tluan thei lo.

Jabeur hi 7-6 (7-5), 2-0 in a hniam zawkah a ṭang mek a, khaw lum vangin harsatna a tawk bawk. A taksa lum lutuk tih daih nan vur a hmang a, a hnuah minute 14 chhung enkawl lailawk ngai leh mah se a khel zui thei ta lo a ni.

Emma Raducanu erawh a chak thung - British number 1 Raducanu hian Mimi Xu chu 6-3, 6-3 a hnehin second round a lut. Mimi Xu hi kum 17 mi chauh niin Grand Slam a khelh vawi khatna a ni a, atan thil a la harsa deuh tih a lang.

Australian Open champion Madison Keys chuan set a hloh hmasak hnuah Elena-Gabriele Ruse chu 6-7 (4-7), 7-5, 7-5 in a hneh. Season hmasa finalist Jasmine Paolini pawhi fiahna paltlang turin world number 402 Anastasija Sevastova chu 2-6, 6-3, 6-2 in a hneh bawk.