Spurs-in Richarlison mamawh lo

Tottenham Hotspur chuan striker Richarlison an chhuahtir dawn a, coach thar Thomas Frank chuan Brazilian striker hi chhuah phalna a pe tawh niin an sawi.

Galatasaray chuan Richarlison hi lakluh tumin an hnaih nia sawi a ni a, a man pawh a to dawn lo - pound maktaduai 20 bawr vel ni tura ngaih a ni a, kum thum liam taa Spurs-in an lei khan £50mtd an inseng.

Richarlison hi Everton pawhin lak let an tum anga sawi ni mah se, manager David Moyes chuan mamawh loah a inngai a, Brazilian striker hi lei tumna a nei lo - Galatasaray-in an chan ngei a rinawm.

Kum 28 mi Richarlison hian Spurs-ah beisei a phak lo. A season hmasa berah match 35 khelin goal thum chiah a khung a, 2023-24 season-ah hma sawn hretin, match 31-ah goal 12 a khung a, assist vawi li a nei bawk.

Mahse, Richarlison hi a vanduai ve bawk - season hman zawh takah khan hliam vangin a buai zui a, match 24 chiah khelin, goal nga a khung a, assist vawi hnih a nei - £50mtd man forward hnathawh atan a ṭha tawk lo.