Osaka a chak ve phawt

Grand Slam vawi li ngawt champion tawh ni mah se Naomi Osaka tan Wimbledon hi hmun ṭha a ni ngai lo, kuminah beisei nei sang vak lo chungin a inlan - Japanese star hian a match hmasa berah Talia Gibson chu 6-4, 7-6(4) a hnehin second round a lut.

Thawhṭanni zan khan Court 18-ah Osaka hi a inlan a, a service vawi thum hloh mah se a khingpui service chu vawi li a chhuhsak let thung a, set hnihnaah inkhel tawk viau mah se a vannei zawkah a ṭang.

Osaka hian Australian Open leh US Open nomawi vawi hnih ve ve a la tawh, hard court-ah chuan a ṭha hle. Mahse, French Open leh Wimbledon-ah chuan third round a la paltlang ngai lo; Roland Garros khelh zawh takah pawh khan hneh nei loin a tla.

Wimbledon2017 leh 2018 khan vawi hnih a lo chak zawn ve tawh a, kuminah hian vawi hnih chak tur chuan Qinwen Zheng leh Katerina Siniakova te inkhela chak zawk a hneh leh a ngai dawn, tu emaw zawk zawk pawh hi ni se hmachhawn an awlsam dawn lo.

Fa a neih avangin Osaka hian hun rei tak chhung tennis a chawlhsan lailawk, a inkhelh leh theih hnuah ngai la awh leh lo mah se hma a sawn leh tawh hle. Kum 27 mi chauh a la nih avangin ṭha taka khel chhuak leh turin hun a la nei a ni.