Calvert-Lewin a chhuak dawn

Everton striker Dominic Calvert-Lewin chuan thutlukna harsa tak a siam thu a sawi a, nipui bazar lai hian man nei loin Everton a chuahsan dawn tih a chiang ta a ni.

Kum 28 mi Calvert-Lewin-a contract kha June 30 thleng daih a ni. An pawhsei loh avangin Thawhṭanni khan Toffees nena an inremna chu a tawp a, atan khaw dang hawi ngei a ngai nghal bawk.

England international Calvert-Lewin chuan, "Season kua zet hun ka hman tawh hnuah thutlukna harsa tak ka siam a ngai, kei leh ka chhungte chuan zinkawng thar kan zawh a ngai dawn ta a ni.

"Everton hian ka nunah hmun pawimawh tak a luah, kum 19 mi chauh ka nih lai aṭanga ka chenna hmun a ni. Ka theihna min hmuhsak a, min ringtawkin min chher hriam bawk a, player chauh ni loin mi puitling ka nih theih nan min chher.

"Hun ka hman chhung a ka khelh pui leh coach ka hrawn tak zawng zawng chungah khan lawmthu ka sawi, awm ho chhunzawm tawh lo mah ila ka tan chuan ṭhian ṭha tak an ni chhunzawm zel ang," tiin a sawi.

Calvert-Lewin hian Sheffield United aṭangin kum 2016 khan Everton hi a zawm a, pound maktaduai 1.5 man a ni. Toffees tan hian inelna hrang hrangah match 273 khelin goal 71 a khungsak hman.

Premier League 2020-21 season kha a hmang ṭha hle a, goal 16 a khung - England tana khel tur pawhin an ko hial. Mahse, a hnu lamah hliam vangin a buai zui, season hmasa khan match 26 khelin heng zinga a zatveah chauh hian bul a ṭan phak.

Everton hian season thar aṭangin an khelmual thar Bramley-Moore Dock an luah dawn a, striker Calvert-Lewin a chhuah dawn avangin hmatawng thar an melh a ngai dawn; tunah hian Villarreal forward Thierno Barry chu an thlithlai mek a ni.