Jhon Duran-a'n Saudi chhuahsan dawn

Aston Villa striker hlui Jhon Duran chuan Al Nassr-ah thla ruk chauh hun la hmang mah se, Saudi Pro League club hi chhuahsan a duh nia sawi a ni a, Fenerbahce nen an sawizawm mek.

Kum 21 mi Jhon Durán hian January 2023 khan Chicago Fire aṭangin Aston Villa a zawm a, a man hi pound maktaduai 17.5 a ni. Mahse, kumin January khan Al Nassr lamah £70mtd-in an hralh a, sum tuakna ṭha tak a ni!

Mahse, thla ruk chauh Saudi-ah a khel hman tihin Europe-ah a kir leh dawn a, Jose Mourinho enkawl Fenerbahce hian season khat atan loan-in an hawh dawn niin khawthlang media-te chuan an ziak.

Colombia tan vawi 17 inlana goal thum khung thei striker hian Villa tan match 78 khelin goal 20 a khung a, Al Nassr-ah match 18 khelin, goal 12 a khung.

Duran hi Premier League club Manchester United leh West Ham pawhin an duh nia sawi a ni a, mahse, UK-a a kir chuan sorkar dan angin chhiah a chawi ṭeuh a ngai dawn.

Colombian striker hian Al Nassr-ah hian kar khatah £320,000 a hlawh mek a, chhiah a chawi lo. Mahse, UK sorkar danah, kum hnih pawh tling lohah UK-ah bawk a kir leh chuan, chhiah a chawi ṭeuh a ngai dawn - hei vang hian Duran hian Premier League lam hawi loin Fenerbahce lam hi a hawi niin an sawi.

Duran lak tum hian Feberbahce director Devin Özek chu Colombia-ah a zin a, Colombian striker hian Turkish club sawmna a pawm niin an sawi - season tharah Jose Mourinho hnuaiah a khel dawn tihna a ni.