Juventus-in Osimhen an duh

Serie A club Juventus chuan team dinthar leh an tumna kawngah Victor Osimhen an rim chhunzawm a, Nigerian striker hian a zawm duh thu a tihchian chuan Napoli dawr chhunzawm an tum.

Kum 26 mi Osimhen hi Saudi Pro League club Al Hilal chuan sum tam tham takin sawm mah se, Europe-a khelh chhunzawm a duh avangin Saudi club sawmna hi a hnar nia sawi a ni a, tunah Juventus an lo lang ve leh ta.

Osimhen hian Napoli tan Serie A nomawi chawiin, fan-ten âtchilh rawn mah se, club nen an inhmu thiam lo a, season hman zawh tak pawh khan Galatasaray-ah loan-in a khel.

Turkish club lamah pawh Osimhen hi chet ṭhat chhunzawmin, match 41-ah goal 37 ngawt a khungsak a, assist vawi riat a nei bawk - Juve-in Serie A lama lak let an hnial lo.

Mahse, Juventus hian Osimhen an ngaichang phawt a, Nigerian striker lakluh nan Dušan Vlahović hralh phawt an duh bawk. Serbian striker Vlahović hian season kal mekah match 44 khelin goal 17 a khung a, assist vawi nga a nei.

Juve hian Vlahovic hi pound maktaduai 34 tala hralh theih an inbeisei a, heti zat hi chuan lei duh an awm nualin a rinawm.