Arsenal keeper thar Kepa

Khawvela goalkeeper man tam ber pawh lo ni tawh Kepa Arrizabalaga chuan Asenal a zawm - Spain international hian Emirates Stadium-ah kum thum chhung cham turin contract a ziak.

Arsenal hian David Raya an nei sa, loan hmanga an hawh second keeper Neto erawh a chhuak thung - Kepa hian Raya hi a elphak dawn em tih hriat a la ni lo a, keeper pahnih ten hmun chan tumin thapui an thawh a ngai ngei ang.

Kum 2018 khan Athletic Bilbao aṭangin Kepa hian pound maktaduai 71 tehmeuhin Blues hi a zawm a, khawvela keeper man tam ber niin ani aia man tam an la awm lo hial, tunah erawh North London a zawmna hi pound maktaduai 5 a ni thung.

Chelsea tan a tir lamah hmun pawimawh chang ṭhin mah se, tun hnaiah erawh a khel phak ta lo. Season hmasa khan Bournemouth tan loan hmangin a khel a, match 35 khelhsakin rintlak a nihzia chu a la lang thei a ni.

Kepa chuan, "Arsenal hian hmathlir fel tak an nei a, coach Mikel Arteta leh Inaki Cana te nen kan inbia a, an hmachhawp leh khalpung min hrilh khan an hnena kal ve kha ka duh ta a ni," tiin a sawi.

Sporting director Andrea Berta hoin Arsenal hi nipui bazarah an che vel mek. Midfielder Thomas Partey a chhuak a, ani ang bawka contract hmang zo Jorginho an chelh lo bawk a, squad siksawi turin hna an la ngah.

Brentford captain Christian Nørgaard chu inremna an neih pui tawh a, tunah chuan tlarhma lam thuam chak tuin striker an bawhzui a ngai tawh dawn, hming hrang hrang nen sawizawm ni ṭhin mah se hnai taka kalchilh erawh an la nei rih lo niin a lang.