Leverkusen-in Quansah an la lut

Bayer Leverkusen chuan Liverpool aṭangin Jarell Quansah an la lut a, English defender hian kum nga chhung atan contract ziakin, a contract hi kum 2030 thleng a ni.

Liverpool thu-chhuahin a tarlan danin Quansah man hi pound makatduai 30 a ni a, lei let theih dan awmin a man turah hian inremna a awm sa vek bawk.

Journalist lar Fabrizio Romano chuan a chet ṭhat dan a zirin German club hian £5mtd an la pek belh leh theih thu a ziak. Hei bakah hian lei let theihna hi kum 2027 aṭanga nung ṭanin, a man hi €60mtd bakah a chet ṭhat dan a zira pek belh theih dan a awm, niin a tarlang bawk.

Liverpool leh Leverkusen hi tun nipuiah an indawr ngun tawh hle. English club hian Bundelsiga club aṭang hian Florian Wirtz leh Jeremie Frimpong te an la lut tawh.

Leverkusen hian Bayern Munich lakah Jonathan Tah an chân tawh a, loan hmanga Atalanta-a chhuak Odilon Kossounou pawh a ngheta contract a ziah a rinawm avangin German club hian tlarhnung thuam ṭhat an mamawh.

Kum 22 mi Quansah hi Liverpool academy chhuak a ni a, 2023-24 season aṭang khan hming chher ṭanin Reds tan league-ah match 30 a inlan tawh. Chutihrualin season hman zawh taka Arne Slot-a hoa an champion-naah khan vawi li chauh bul a ṭan a, match hmasa bera Ipwisch an hneh ṭumin half time-ah an la chhuak.

Leverkusen hian player ṭhahnem tak bakah an manager Xabi Alonso chu Real Madrid lakah an chân a, Manchester United manager hlui Erik ten Hag an la lut a, Dutch manager hnuaiah indinthar an tum dawn a ni.