Jobe-a'n a u Jude hmachhawn dawn lo

FIFA Club World Cup last 16-ah Borussia Dortmund-in nimin zing khan Monterrey 2-1 in an hneh a, quarterfinal-ah Real Madrid an hmachhawn dawn. Jobe Bellingham leh a u Jude Bellingham te intawng tura ngaih ni mah se Jobe hian Mexican club lakah yellow card a hmuh avangin hrem vangin Spanish club lian a hmachhawn thei lo ang.

Mercedes-Benz Stadium, Atlanta-a inkhelah German club-in bul an ṭan ṭha a, Serhou Guirassy hmangin minute 24 chhungin goal hnih an khung. Minute 14-naah Karim Adeyemi leh Guirassy ten Mexican club tlarhnung mawi zetin an ṭhiat a, Guirassy-a'n cool zetin a khung.

Minute 10 hnuah Dortmund no. 9 a rawn inlar leh a, Adeyemi thawhrah sengin ṭha zetin Guirassy hian ṭha zetin a pet goal a, Mexican club tlarhnung a pawp ve bawk.

Guirassy-a'n ṭum hnih ngawt hattrick siamna hun ṭha a bawlh pelh a, first half-ah goal a luh belh tawh lo. German club erawh nuam sain an chak lo a, a khat tawkin Mexican club-in an tibuai ve reng bakah minute 48-naah Germán Berterame-a'n ṭha zeta tauh lutin siphurh an sut ṭhen.

Porto leh Sevilla tana khel tawh Jesús Manuel Corona pawhin chance ṭha bik a nei a, Dortmund goalkeeper Gregor Kobel chiah a hmachhawn hnuah a khung lo. Berterame pawhin goal dang a khungah a inngai a, offside vangin pawm a ni lo.

Injury time-ah Sergio Ramos-a'n box pawn aṭangin ṭha zetin a tauh a, goal pawnah chiah a kal. Goal chhungah chuan lut ngat se, Dortmund keeper Kobel tan dan ngaihna a awm lo ang. Niko Kovac hote an ṭangtluan a, 2-1 a chakin quarterfinal an lut.