Liverpool-in Bayern an hnar

Premier League champion Liverpool chuan Luis Diaz chu zawrh lai a nih loh thu Bayern Munich an hrilh - German club hian Colombian forward lakluh tumin Reds hi an dawr a, mahse, Merseyside club hian rang takin an lo hnar nghal.

Bayern director of sport Max Ebrel chuan Diaz hi ngaihvenin Liverpool lam a be pawp a, mahse, English club hian an player chu hralh tumna an neih loh thu lo sawiin, inbiak an duh loh thu an lo hrilh.

Kum 28 mi forward hi Barcelona pawhin an duh a, mahse, Reds hian Catalan club hnenah pawh an player hi zawrh lai a nih loh thu an lo sawi tawh.

Diaz hian January 2022 khan Liverpool hi a zawm a, hetihlaia a man zat hi pound maktaduai 37.5 niin, a khelh ṭhat dan a zira pek belh tur hi £12.5mtd a ni.

Liverpool tan hmun pawimawh chang nghalin, season hman zawh taka Premier League champion an nih theih nan a thawhhlawk hle - inelna hrang hrangah match 50 khelin goal 17 a khung a, assist vawi riat a nei bawk.

Diaz hian Anfield-ah kum hnih dang cham turin contract a nei mek a, team tana a ṭangkai ngaihtuah erawhin a hlawh a tam lo hle - kar khatah £55,000 vel a hlawh nia sawi a ni a, a theihna enin, hei aia tam hlawh a phu.

Liverpool lam pawhin an player hi chelh an duh chuan contract thar an pek vat a ngaiin a rinawm. Season hmasa nipui lai khan Manchester City pawhin Diaz hi an lo rim tawh a, Saudi lam pawhin an thlithlai.

Mahse, nipui international break lai khan Diaz hian Anfield-a a hlim thu a lo sawi tawh a, Colombian forward chuan, "Liverpool-a ka hlimzia hi chu ka lo sawi fo tawh a, he hmunah hian min duat hle bawk," a ti.

Diaz chuan sawi zawmin, "Transfer bazar a inhawng mek a, kan tana ṭha ber tur hi kan ngaihtuah chu a ni a, thil thlen dan chu kan chiang zel ang. Reds hian contract thar min pe emaw, ka contract neih sa hi hmang zo tura min duh emaw a nih chuan ka hlim khawp ang.

"Engkim hi Liverpool kutah a innghat a, kei chuan kan tana ṭha ber tur leh, kan hma hun hi ka ngaihtuah chu a ni mai," a ti a, Anfield chhuahsan tumna a neih loh thu a sawi.

Diaz hian Liverpool tan EPL bakah FA Cup, League Cup (2) leh FA Community Shield nomawi a lo chawi tawh a, Champions League 2022-ah final a hruai thleng bawk.