Everton-ah Branthwaite a rinawm

Jarrad Branthwaite chuan Everton-ah kum nga chhung atan contract a ziah belh. Kum 23 mi English defender contract hi a ziah belh hma hian kum 2027-a tawp tur a ni a, chutihrualin Everton hian kum khat atana pawhsei theih dan an nei thung.

Nikum nipui bazarah khan Man United-in Branthwaite lak tumin Toffees hi ṭum hnih an dawr a, £35mtd leh £45mtd-a an dawrna chu an hnawl ve ve. Hemi hnu aṭang hian club lian zawkin Branthwaite hi an enthla reng.

Branthwaite chuan, "Ka lawm khawp mai. Season tawp aṭanga kan buaipui ṭan tawh kha a ni a, contract thar ka ziak hian min tiphur. Club-in ka chungah rinna an nghat a, season hnih chhunga ka khelh dan thlir hian contract thar ziah hi a harsa lo," tiin a sawi.

English defender hian season hnuhnung pahnihah match 30 a khel tling ve ve a, Everton-ah hmun pawimawh a chang. Toffees hian kumin January khan David Moyes an la let a, relegate thei dinhmuna ding tawh kha 13-na niin season an khar a, season thar atan an inbuatsaih ṭha viau bawk.

Everton hian kumin June thla tawpa contract tawp tur Michael Keane leh Idrissa Gueye te contract an pawhsei sak tawh a, Villarreal aṭangin €32mtd velin forward Thierno Barry an la lut tawh bawk. Toffees hian season thar Premier League match hmasa berah kai thar Leeds United an hmachhawn ang.