Sunderland-in club record siam

Championship aṭanga Premier League kai thar Sunderland chuan EPL-ah a tikimtu mai nih an tum lo tih an pholang a, Strasbourg midfielder Habib Diarra chu club player man to ber ni turin an la lut - a man hi pound maktaduai 30 a ni.

Diarra hian season hman zawh takah khan Strasbourg tan match 33 khelin, goal li a khung bakah, assist vawi nga a nei a, Ligue 1-ah pasarihna niin, kum 20 chhunga a vawi hnih nana European football khel turin a hruai thleng.

Kum 21 mi Diarra chuan, "Black Cat (Sunderland sawina) chhungkaw zinga ka awm ve thei tur hi ka phurin ka lawm takzet a, Stadium of Light-a inkhelh a, fan-te nena hun hlimawm tak hman ka châk tawh hle a ni," a ti.

Diarra hian Sunder-land-ah hian kum nga khel turin contract a ziak a, kum 21 chauh la ni mah se, Ligue 1-ah season thum chu regular takin a khel tawh a, Senegal tan match 11-a khelhah goal li a khung tawh bawk.

Diarra chuan, "Season hmasaa he club hlawh-tlinna kha mi zawng zawngin an hria a, he club tan hian Premier League-ah ka theihna zawng zawng ka hlan ang tih ka tiam a ni. He chona phurawm tak hmachhawn tur hian ka inpeih a, inlan vat vat ka châk tawh hle," a ti.

Sunderland hian 2016-17 season hnua a vawi khat nan Premier League an khel dawn a, Diarra hian Sunderland-in Borussia Dortmund lama £30mtd-a an kaltir Jobe Bellingham hmun ruak a luah dawn a ni.

Black Cats tan Diarra hi tun nipuia an player lakluh pahnihna a ni a, season hmasa chawhnu lama AS Roma aṭanga loan-a an hawh midfielder Enzo le Fee chu a nghetin an la tawh bawk - kum li chhung atan contract a ziak.