Fulham-ah Tete-a a cham dawn

Everton-in lakluh tumin hel mah se, Fulham right back Kenny Tete chuan Craven Cottage-a cham a thlang ta zawk a, kum 2028 thleng London club tana khel chhunzawm tur hian contract thar a ziak.

Kum 29 mi defender hian tun season zawh rualin Fulham-ah a contract a hmang zo a, duh lam pan tura zalenna a neih avangin Everton a pan mai rinna a lian hman.

Mahse, kum 2020-a Lyon aṭanga Fulham pantu hian a sukna ngaia suk a thlang leh ta zawk. Tete chuan, "Ka tan mai ni lo, ka chhungkaw tan contract thar ka ziak thei hi thi lawmawm a ni a, kum thum lo awm turah hian fan-te lawmna ka thlen chhunzawm theih ka beisei," a ti.

Netherlands tana vawi 14 inlan tawh defender chuan sawi zawmin, "Fulham-ah kum khat hun ka hman chiah khan, he club hi chu chhungkaw club, hma ka sawn theihnna tur a ni tih kha ka hrethiam nghal. He team tana khelh zel hi ka duh a, hmasawn tura kan thawhho zel ka beisei," a ti a, Everton lamin a lung a len lo.

Hetihlai hian Everton erawhin tun nipuiah player a ngheta lakluh pakhat chiah an la nei a, hei pawh January-a loan-a an hawh tawh, Flamengo attacking midfielder Carlos Alcaraz-a ngheta an lakluh chu a ni.