Monaco-ah Fati a kal

Barcelona rawlthar duhawm tak ni ṭhin, a laka beisei an neih san em avanga Lionel Messi-a hak hlui Jersey No 10 an haktir hial Ansu Fati chuan AS Monaco chu loan hmangin a zawm.

Fati hi theihna nei sang bik a ni a, mahse hliamin a tihbuai fo avangin a ropui hleithei lo - Premier League club Brighton & Hove Albion tan pawh loan hmang bawkin a lo khel tawh, season hmasa erawh kha chuan Barca tan match 11 a khel thung.

Spain international Fati hian Monaco hi season khat chhung atan a inrem pui phawt, loan hun a zawh hunah Ligue 1 club hian pound maktaduai 9.4-in an lei nghet thei dawn a, a chhuah hlen pawh a rinawm.

Barcelona chuan jersey no 10 chu Lamine Yamal an hak tir tur thu an sawi tawh a, hei vang hian Fati hi chhuak hlen mah se pawi an ti lo niin a lang, lei chhuah theihna zat an ziah pawh a tam ta vak lo a ni.

Nipui bazar chhungin AS Monaco hi an che na chho hle, man nei loin Paul Pogba leh England defender Eric Dier te an lo la tawh bawk, an inremkhawm fuh chuan Ligue 1 team hmuhnawm zinga mi an ni thei ang.