No 1 hmachhawn tur Raducanu

British mipui ten tennis an ngaina a, player ropui bik neih an chak ṭhin - Emma Raducanu a rawn lang a, a lakah beisei an nei sang hle. Wimbledon khelh laiah Raducanu hian third round a lut, a hmachhawn tur chu Aryna Sabalenka a ni.

Nilaini zan khan Centre Court-ah Raducanu hi a inlan, darkar khat leh minute 22 chhungin 2023 champion Marketa Vondrousova chu 6-3, 6-3 a hnehin second round a paltlang, atan chuan mellung pawimawh a ni ngei ang.

US Open pawh champion tawh Raducanu chuan, "Ka beisei phak baka ṭhain ka khel, point ṭhenkhat kha chu engtiang in nge ka hmuh theih tih pawh ka hrethiam lo hial, mak tak maiin ka ti dik leh mai ṭhin.

"Marketa kha hmachhawn a harsa dawn tih ka hre sa a, champion tawh a nih avang ringawt pawh kha huhang a nei. Ka tan chuan ani paltlang theih hi a ropui a, tawpsan mai erawh ka tum dawn lo," tiin tlang zel a tum.

Inkhel dangah Aryna Sabalenka chuan Marie Bouzkova chu 7-6(4), 6-4 in a lo hneh ve thung a, player langsar an chetsual sup suo karah Sabalenka erawh a la chefuh zel a, chesual ve thei a ni tih erawh a lang.

World number 1 a ni a, tun ṭumah hian seeded pakhatna a ni bawk. Sabalenka chuan, "Ka chungah hian result maksak tak thleng ve lo hram se ka duh. Inkhel hautak taka vannei takin hnehna ka chang hram," tiin a sawi.

Sabalenka leh Raducanu te hi zanina inkhel tur an ni a, chanchinbu buatsaih lai hian an inkhelh ṭan hun tur erawh hriat theih a la ni lo thung; inkhel a hmuhnawm dawn tih a chiang a, British mipui ten an ngaihven zual ang.

Wimbledon khelh laiah hian seeded sang zual panga zinga pali an tla tawh - Coco Gauff (2), Jessica Pegula (3), Jasmine Paolini (4) leh Qinwen Zheng (5) te an tla nghal a, number 1 Sabalenka erawh a la dam thung a ni.