Ka hrethiam thei lo - Ronaldo

Portugal tana Diogo Jota khelhpui, player ropui bik Cristiano Ronaldo pawh a ṭhianpa thihnain a nghawng a, Al Nassr forward chuan, "Hriatthiam theih thil a ni lo," a ti.

Ronaldo chuan, "Hmanni lawkah national team tan kan khel dun a, hmanni lawkah nupui i nei a ni lawm ni," a ti a, Jota chunga thil thleng chuan a ṭhawn thu a sawi.

Real Madrid legend chuan, "I chhungte, i nupui leh fate ka tawrhpui em em a, khawvelin chakna a pek theih zawng zawng an chan ka duhsak a ni. An kiangah i awm reng ang tih ka hria. RIP Diogo leh Andre, kan ngai ngawt ang che u," a ti.

Jota hian national team tan match 49 khelin goal 14 a khung a, assist 12 a nei. Portugal tan hian UEFA Nations League-ah nomawi vawi hnih a chawi bawk.