Ka thinlung a kehsawm - Jurgen Klopp

Liverpool-a Diogo Jota la luttu, Reds manager hlui Jurgen Klopp chuan Jota thihna avanga a thinlung a kehsawm thu a sawi - a demawm hran lo e.

Klopp chuan, "Hetiang hunah hian a ni, harsa ka tih ṭhin. Diogo, i liam mai hian chhan ṭha zawk a nei a ni mahna ka ti a, mahse, tunah chuan chu chhan ṭha zawk chu ka hre thei lo," a ti!

German coach chuan sawi zawmin, "Diogo leh a unaupa Andre thihna hian ka thinlung an tihkehsawm a ni. Diogo hi player ṭha tak a ni mai lo a, ṭhian ṭha tak, nupui fanaute ngaihsak em emtu pa ṭha a ni bawk.

"Kan va ngai dawn tak che em - Rute-i, an fate, chhungkua leh Diogo ṭhian ṭha, amah hmangaihtute zawng zawng ka hre reng a ni. Thlamuangin chawl ang che," a ti a, phal lo chungin Jota a thlah.

Klopp hian September 2020 khan Jota hi Wolverhampton Wanderers aṭangin Liverpool-ah a la lut a, a man hi pound maktaduai 41 niin, a khelh ṭhat dan a zira £4mtd pek belh tura tih a ni.

German coach kaihhruaina hnuaiah FA Cup leh League Cup (2) ah champion nomawi a chawi a, Champions League final khel bawk mah se, nomawi erawh a chawi ta lo.

Reds tan match 182 khel hmanin, goal 65 a khung bakah, assist vawi 26 a nei a, season hman zawh takah khan Arne Slot kaihhruaina hnuaiah Premier League champion an ni.