I chhungte tan kan awm reng ang - VVD

Liverpool captain Virgil van Dijk chu Reds tana a khelhpui, a ṭhianpa Diogo Jota thihna avangin a ṭawng chhuak ve ta a, Jota nupui fanaute tan an awm reng tur thu a sawi.

VVD chuan, "Ṭhianpa, awih har ka ti a, awih pawh ka duh lo. Mak tiin ka indawm kun tlawk tlawk mai a nih hi. Mi ṭha leh player ṭha i ni a, a pawimawh berah chuan chhungkaw pa i nih kha!

"Kan tan hian i hlu em em a, i hlu reng bawk ang. I chhungten an fapa pahnih, an pasal leh pa an chân a, a rapthlakin, a fair hi ka ti thei thlawt lo a ni," a ti a, an ṭhianpa thihna chu pawm thiam harsa a ti hle.

VVD chuan sawi zawmin, "I chhungte, Rute leh i fate ka tawrhpui takzet. Ka tiam a che - he hun harsaah hian an tan kan awm tlat dawn a, nakin zelah pawh kan awm ang," a ti.

Liverpool captain chuan, "Kan number 20, champion ni kumkhua tur i ni. Khelmualah i kianga ka ding thei kha ka inchhuang a, a pawn lamah i ṭhianpa ka nih avangin ka lawm.

"Sawifiah thiam phak loh khawpa nasain kan ngai dawn che a, kan theihnghilh miah lo ang che. I sulhnuten hriatreng an hlawh dawn a, hriatreng an nih nan theihtawp kan chhuah bawk ang.

"Diogo leh Andre, thlamuanna duhawm takah chuan chawl ang che u aw," a ti a, awih phal lo chungin Jota a thlah liam.