Eng nge ka sawi ang? - Arne Slot

Liverpool head coach Arne Slot chuan a player Diogo Jota thihna avanga sawi tur a vaih thu a sawi a, hrehawm a ti hle. Dutch coach chuan, "Eng nge ka sawi ang? Hetiang taka hliam na leh hrehawm tuar chung hian eng nge ka sawi ang? Sawi chhuah theih ka duh a, mahse, ka kha a chhih vek si," a ti thlawt!

Slot chuan, "Mi tam takin Diogo hi an ui ang tih ka chiang a, ka rilrua lut hmasa ber pawh hriatthiam phak rual loh hliam tuartu Diogo leh Andre Silva chhungte an ni. An hnena ka sawi duh chu, an tawrhna hian malin an awm lo, tih hi a ni.

"Liverpool player, staff leh he club ṭantu zawng zawng hi in tan kan awm reng dawn. Football chhungkua tawp hian an hre reng che u, tih hi vawiinah ka hmu bawk," a ti.

Slot chuan club tan chânna nasa tak a nih thu sawiin, "Kan club tan chuan hriatthiam har tak a ni. Diogo hi kan player a ni satliah lo - kan hmangaih em em a ni. Kan khelhpui, kan thawhpui, kan ṭhian a ni a, a hlu em em. Team tana a ṭangkaizia hi sawi tur ka nei ṭeuh a, mahse, a inkhel en ṭhin chuan hrilh kher ngai loin an hre vek.

"Player thawkrim, chak duh, inpe, theihna nei sang tak leh goal khung thei tak a ni a, Liverpool player ni tura miin a mamawh ang chu amahah hian a awm vek a ni," a ti thlawt!

Slot chuan Premier League nomawi a chawipui player chu fak zuiin, "Mi tam takin an hmuh loh amahah hian a awm. Lar a khêl ve ngai lo a, mahse, a lar tho a. Mi zawng zawng kawm thei mihring, mite tana hlimna thlentu, a chhungte ngaihsak em em reng a ni.

"Jota nena kan inbiak hnuhnun berah chuan, Nations League-a an champion avangin ka lawmpui a, a nupui neih turah ka duhsakna ka hlan bawk. Kawng tam takah Diogo tan chuan tun nipui hi hun duhawm a ni a, heti maia a tawp leh ta hian a tilungchhiat thlak zual a ni," a ti a, a player thihna a tuar thiam lo.