Mangṭha Diogo MacJota - Andy Robertson

Liverpool-a Diogo Jota ṭhian ṭha zinga mi, a nupui neihnaah pawh kal vang vang Andy Robertson pawhin Jota a thlah. Scotland captain chuan, "Diogo chhungten ka rilru an luah reng - tawrhthiam a har turzia hi aw!

"Ka inkhelhpui, ka ṭhian, ka hmangaih em em, ka va ngai dawn tak che em! Player a nihna anga a ropuina chu darkar tam fe ka sawi thei ang, mahse, chu chuan awmzia a nei rih lo," a ti.

Roberston chuan sawi zawmin, "Mi ṭha, nihna anga lang ṭhin, a hmangaihte tana inpe em em, nun hlimawm tak hmangtu kha! Foreign player siah chuan a British em em a, Scottish ni se ka duh a, Diogo MacJota tiin ka ko fiam ṭhin.

"Thil tam tak kan ti dun a, ka hmuh hnuhnun berah chuan a hlim takzet - a nupui neih ni a nih vang a ni. Hlim taka a nui hmel kha hriat reng ka duh a, a nupui leh a chhungte tana a hmangaihna luangliamte kha aw!

"Kan inthlah a ngai ta mai hi a mak ka ti. A la hun lo ka ti a, na ka ti a ni. Mahse, ka ṭhian, ka nun hi nun hlimawm zawka i siam avangin lawmthu ka hrilh a che. Ka hmangaih che, Diogo," a ti a, a ṭhianpa a thlah liam.