Fiahna paltlangtu Swiatek

A khelh fuh ni chuan Iga Swiatek hi dan theih loh ang mai a ni, a bik takin clay court-ah a chungnung - Grass erawh inkhelh harsa a tihna hmun a ni a, tun ṭumah pawh chesual thei dinhmuna a din hnuin a tho chhuak leh hram.

Grand Slam vawi nga champion tawh Swiatek hi Ningani zan khan Centre Court-ah a inlan a, darkar hnih leh minute 25 an inkhelh hnuah Caty McNally chu 5-7, 6-2, 6-1 in a hneh, set hmasa ber a hloh hnuah a tho chhuak tihna a ni.

Wimbledon 2025 khelh laiah player langsar an chesual nasa em em a, seeded sang zual panga zingah pakhat chiah a dam tawh hial. Swiatek hi seeded pariatna pek niin, ani pawh a chetsual mai rinna a lian hman hle.

Mahse, kum 24 mi Swiatek hian rilru fim a pu a, set hmasa berah talbuai deuh mah se a rei hnuah a khel ṭha tual tual, set thumna leh a hnuhnung ber ni bawkah phei chuan game khat chauh hloh chungin a tlang.

Grass-ah Swiatek

Polish nula Swiatek hi tunlai player ṭha berte zinga mi a ni a, nomawi pawh 22 tehmeuh a vaw chhuak tawh. Mahse, atan chuan grass court hi engtik lai mahin hmun ṭha a ni ngai lo, nomawi a lak tawh zingah hian grass court tournament a la tel miah lo.

Swiatek chuan, "Grand Slam a nih tawh chuan chetsual theih tak a ni, a bik takin tihsual kan ngah a nih chuan hremna kan hmachhawn nghal a ngai zel ṭhin. Martch hmasa leh tun ṭumah pawh a tir lamah khan tihsual ka ngah.

"Ka chiai hman lek lek, mahse rilru fim ka pu tlang thei hram a, a tawpah chuan result ṭha ka neih theih phah," tiin a sawi. A match lehpekah chuan Danielle Collins a hmachhawn dawn a, seeded ni phak lo zinga mi a nih avangin Swiatek hi rinkai zawk a ni ang.

Kum 24 mi Swaitek hian Wimbledon hi a khel ṭha ngai vak lo, kum 2023 khan quarterfinal lutin a thlen san ber ṭum a ni. Kuminah hian champion tura rinkai zingah a tel phak meuh lo a, mahse beisei loh result kan hmuh nasat avangin eng pawh thleng thei a ni.

Champion lai a chak

Mi tam tak an chetsualna karah Barbora Krejcikova erawh a dingnghet tlat - Wimbledon champion lai hian Caroline Dolehide chu 6-4, 4-6, 6-2 a hnehin third round a lut a, a nomawi kawl lai humhim turin kawng dik a zawh mek zel.

Hmeichhe player zingah Wimbledon title humhim thei hi an tam lo. Serena Williams khan kum 2015 leh 2016 khan a la zawn, ani hnuah phei chuan a zawna champion leh thei an la awm lo, kuminah Krejcikova hian beisei a nei chho mek.

Czech Republic nula Krejcikova chuan, "Thla riat liamta vel kha chuan hliam leh harsatna dangin min tlakbuak a, ṭha takin ka khel leh thei ang em tih pawh ngaihtuah ngam a harsa, tunah erawh ṭha taka ka khelh bakah hnehna ka chang zel hi a lawmawm," a ti.

Inkhel dangah Elena Rybakina chuan a khingpui world number 77 Maria Sakkari chu 6-3, 6-1 in a hneh. Tleirawl Mirra Andreeva pawhin Lucia Bronzetti chu 6-1, 7-6 (7-4) a hnehin Emma Navarro chu Veronika Kudermetova lakah 6-1, 6-2 in a chak bawk.