Gittens-a'n Chelsea a pan dawn

Chelsea-in Jamie Gittens an lalut thei dawn. Borussia Dortmund-in English winger chungchangah London club nena inremna an neih tawh thu an puang.

Kum 20 mi Gittens man hi £48.5mtd a ni a, a chet ṭhat dan a zirin £3.5mtd-in a pung thei ang. Club pahnih hi FIFA Club World Cup khelin Untied States-ah an awm mek a, transfer chungchanga inremna pawh hi Fort Lauderdale, Florida-ah neih a ni.

Dortmund sporting director Sebastian Kehl chuan, "Chelsea nena kan indawrna hi kan tan chona a ni a, kan sum dinhmun leh club hmalam hun thlirin inremna kan neihpui. Jamie hi player ṭha bik a ni a, Chelsea-ah chona thar hmachhawn a duh a, keini pawhin duhsakna kan hlan," tiin a sawi.

Gittens hian kum 2020 khan Manchester City aṭangin Dortmund hi a zawm a, club tan match 107 khel tawhin goal 17 a khung bakah assist vawi 14 a nei a ni. Inremna an neih tlai avangin Gittens hian Club World Cup zawh hnuah chauh London club tan a khel thei ang.

Chelsea hian tun nipuiah Ipswich striker Liam Delap, Brighton forward Joao Pedro, Sporting midfielder Dario Essugo leh Strasbourg defender Mamadou Sarr te an lalut tawh. Palmeiras tana khel mek Estevao Willian pawhin Club World Cup zawhah Blues hi a zawm bawk ang.