A tawp kan la thleng lo - Hamilton

Lewis Hamilton chuan a team thar Ferrari chuan zawimuangin hma an sawn zel tih a sawi a, mahse tun hma lama team ropui leh ṭha bik an nihna ang chu an la thleng phak lo niin a sawi.

Pathianni zan dar 7:30 hian Silverstone Circuit-ah British Grand Prix an tlan dawn, tun season intlansiak 24 an neih tur zinga 12-na a ni dawn. Hamilton hian British mipui hmaah a vawi khat nan car sen a khalh ang.

World champion vawi sarih ni tawh Hamilton chuan, "Formula 1 hi a inher rem ve reng a, chumi karah chuan Ferrari pawhin tuih dan phung ṭhenkhat tih danglam kan nei a, heng hmalakna hrang hrang hi hma kan sawn theih nana tih a ni hlawm.

"Danglamna hi vawi leh khata a thlen nasat lutuk chuan dawnsawn thiam a harsa ṭhin, kan team pawhin zawimuangin hmalam kan pan, kan ṭhat dan ber erawh kan la thleng lo," tiin a sawi.

British GP-ah hian Hamilton hi vawi kua a chak tawh a, hnehna chang tam ber a ni; nikum pawh khan season hmang ṭha tawk lo mah se a chak thei tho a, kuminah pawh season bul a ṭan fuh tawk loh siamṭhat nan hman ngei a tum ang.