Wimbledon match 100 chak thei Djokovic

Novak Djokovic chuan mellung hlu tak a phun leh ta - Serbian star hian Wimbledon match 100 tehmeuhah hnehna a chang tling ta, zanin hian last 16-ah Alex de Minaur a hmachhawn leh ang.

Wimbledon vawi sarih champion tawh a ni a, a tan chuan All England Club hi thil thar a ni lem lo; Inrinni zan khan Djokovic hian amah ang bawka Serbian mi Miomir Kecmanovic chu 6-3, 6-0, 6-4 in a hneh.

Match 100 chu...

Tennis tournament zinga upa ber tiin Wimbledon hi sawi ṭhin a ni a, a buatsaihtu British miten anmahni an inchawisan thiam em avangin ngaihhlut pawh a hlawh zual; player-ten an ngaihlu ṭhin hle bawk.

Hmeichhe player, vawi kua ngawt champion thei Martina Navratilova leh vawi sarih champion Roger Federer te chu Wimbledon match 105 chak thei an ni a, chak hnem ber an ni bawk; player dang tana zuankahlen tur an siam hi a sang hle.

Centre Court-ah a tir aṭanga a tawp thlengin Djokovic hi a chungnung tluan chhuak zak a, a tan buaina tur lian tham a awm lo. Kuminah hian a champion thei a nih chuan chak tam record chelhtute hi match khat chauhin a phak lo ang.

Grand Slam vawi 24 champion tawh Djokovic chuan, "Wimbledon hi chu naupan lai aṭanga kan en a ni a, keimah chauh ni loin midang pawhin he hmuna hlawhtlin hi an chak ṭhin, tun thlengin kei pawh a la danglam lo.

"Tournament ka ngainat ber maiah mellung pawimawh bik ka phun thei hi ka tan chuan a hlu takzet," a ti a, ṭum danga a lo tih fo tawh angin a chak lawm nan hian a lam a, mipui lawm a hlawh lehpek hle a ni.

Sinner a nghet

Jannik Sinner chuan a vawi khat nan Wimbledon champion nih a la tum chhunzawm ve zel a, Inrinni zan inkhelah world number 1 hian Pedro Martinez hnehin a thiam zual 16 zingah a inhlangkai ve bawk.

Tennis stadium hmingthang Centre Court chu a chung khuhna hman a ni a, boruak lum leh uap tak hnuaia inkhelah Italian tlangval Sinner hian harsatna lian tham a tawk lo, darkar khat leh minute 55 chhungin 6-1, 6-3, 6-1 in hnehna a chang.

All England Club-ah a zawna a vawi li nan last 16 a lut a, kuminah hian mipa player zingah set la hloh lo awmchhun a ni a, game pawh vawi 17 chauh a la hloh - a service a hum zel theih avangin player khel ṭha leh nghet bera chhal theih a ni mek.

Grigor Dimitrov nena last 16 khel tur Sinner chuan, "Chawlhkar hnih chhung inkhelh tur a ni a, hei vang hian Grand Slam chu a danglam, kar khatna kan paltlang thei a nih erawh chuan kawng a inhawng zau deuh ṭhin," tiin a sawi a, champion a tum ruh hle.

Italian tlangval Sinner hi player ṭha bik zinga mi a ni a, kumin Australian Open an khelh zawh khan damdawi hman phal loh vangin thla thum chhung hrem a ni. French Open hma hretin a lo kir leh a, hrem a nih hnuah pawh ṭha takin a khel chhunzawm leh nghal a ni.