Arsenal leh Madueke an inrem!

Football bazar lai a ni a, beisei lawk loh thil thleng a awm ve fo! Arsenal chu Chelsea winger Noni Madueke nen mimal thilah an inrem, inlei fel tur erawh chuan London club pahnih an inrem tel a la ngai dawn thung.

England international Madueke hian Gunners zawm turin thu a titlu tawh a, nimin tlai thleng kha chuan club pahnihten inremna la nei chiah lo mah se, BBC tarlan dan chuan player man chungchangah pawh club pahnih an inrem theih hmel a ni.

Kum 23 mi Madueke hi Blues tan Club World Cup khelin United States-ah a feh chhuak mek a, quarterfinal-a Palmeiras an hneh ṭum pawhin substitute bench aṭangin a lut a, season hmasa khan player pawimawh a lo ni tawh bawk.

Gunners hian an tlarhma thuam chak an tum mek zel - Real Madrid forward Rodrygo leh Crystal Palace hmatawng Eberechi Eze te an thlithlai mek a, tlarhma laia khel tur striker aiin a sir lam an ngaihven leh rih zawk niin a lang.

Eze hi Palace aṭanga la chhuak tur chuan pound maktaduai 68 vel sen rel a ngai dawn niin a lang, hei vang hian Rodrygo man atan sumah buaina an nei thei a, Spanish club nen hian player inthleng bakah pawisa pek belh dan kawng an dap niin khawthlang chanchinbu mite chuan an tarlang bawk.